Қазақстан Республикасы Сауда және интеграция министрлігі 2025 жылғы 12 қыркүйекте өткізілген әлеуметтік маңызды биржалық тауарларды саудалауға уәкілеттік берілетін тауарлық биржаларды анықтау конкурсының нәтижелері туралы хабарлады.
Конкурс Қазақстан Республикасы Сауда және интеграция министрінің 2025 жылғы 24 шілдедегі № 216-ОД бұйрығына және конкурстық негізде таңдау тәртібін реттейтін Ережелерге сәйкес өткізілді. Негізгі критерийлер — ашықтық, технологиялық дамуы және ақпараттандыру мен ақпараттық қауіпсіздік талаптарына сәйкестігі.
Конкурс жеңімпазы ретінде «Тауарлық биржа «Каспий» акционерлік қоғамы анықталды.
Ұйым жоғары стандарттарды көрсетті және тиімді сауданы қамтамасыз ететін заманауи электрондық платформаларды енгізгенін дәлелдеді, сондай-ақ нарық қатысушылары үшін қолжетімділік принциптеріне сәйкес жұмыс істейтінін көрсетті.
Көптеген жылдар бойы биржа технологиялық даму мен ашықтықты тұрақты түрде растап келеді, заманауи цифрлық шешімдерді енгізіп, нарық қатысушылары арасында сенім қалыптастырады. Биржа платформасы жоғары тұрақтылыққа, икемділікке және қолжетімділікке ие: үш тілде жұмыс істейді, көру қабілеті бұзылған адамдардың қажеттіліктерін ескереді және ақпараттық қауіпсіздік талаптарына толық сәйкес келеді.
АО «Тауарлық биржа «Каспий» Президенті Мұрат Кадисов атап өткендей:
«Біз үшін әрқашан нарықтан алда болып, барлық қатысушыларға заманауи және қауіпсіз сауда құралы ұсыну маңызды болды. Бүгін комиссияның шешімі біздің дұрыс бағытта дамып келе жатқанымызды тағы бір рет растайды — ашықтыққа, тиімділікке және ұлттық нарықта сенімділікті арттыруға».
Конкурс жеңімпазын анықтау ұлттық биржалық сауданы дамыту үшін маңызды. Әлеуметтік маңызды биржалық тауарлар тізіміне енгізілген биржалар Қазақстан үшін стратегиялық мәні бар тауарлар бойынша сауда-саттықты қамтамасыз етеді. Комиссияның шешімі мемлекет курсын — сауданы цифрландыру, бәсекелестікті дамыту және операциялардың ашықтығын арттыру — растайды. Қауіпсіз және сенімді деп танылған заманауи электрондық сауда жүйелері нарық қатысушыларының сенімін арттыру және тауар айналымының тиімділігін жоғарылату үшін негізгі құралға айналады.
