Инновациялар мен цифрлық трансформация біздің стратегиямызда орталық орын алады, өйткені олар негізгі бәсекелестік артықшылық, тұрақты дамудың ажырамас бөлігі және корпоративтік экономикалық тиімділіктің драйвері болып табылады.

Компанияның инновациялар және цифрландыру саласындағы қызметіне жалпы басшылықты Биржа Президенті жүзеге асырады.

Біз әртүрлі салаларда автоматтандыру және цифрландыру бойынша жобаларды іске асырамыз, негізгі клиенттерге және биржаның сауда-саттығына қатысушыларға сенімді және қауіпсіз ақпараттық және техникалық қызметтерді, соның ішінде нарықтық деректерді нақты уақыт режимінде ұсынуды қамтамасыз етеміз. Біздің басты міндетіміз – сауда және ақпараттық жүйелердің үздіксіз жұмысын қамтамасыз ету, ал қажет болған жағдайда ықтимал қолайсыз жағдайларға жедел әрекет ету. Біз сатып алу рәсімдері мен бизнес-процестерді цифрландыру биржаның, оның клиенттері мен контрагенттерінің одан әрі төмен көміртекті интеграциясына ықпал ете алады деп санаймыз.

Биржада енгізілген цифрлық шешімдердің ішінде тауарларды, жұмыстарды және қызметтерді сатып алуды тиімді жүргізуге мүмкіндік беретін бірегей электрондық сауда алаңын (ЭСА) атап өткен жөн. ЭСА Ұлттық NADLoC тізілімімен ақпараттық өзара іс-қимылды (синхрондауды) қамтамасыз етеді. Биржада сауда-саттыққа қатысушыларды қолдауға арналған өзінің колл-орталығы да бар.

Инновациялар мен цифрландыруды тиімді басқару үшін цифрлық сауда жүйелерін, оның ішінде әртүрлі кәсіпкерлік субъектілеріне арналған жекелеген жүйелерді әзірлеумен және қолдаумен айналысатын еншілес компаниялар бар.

Атап айтқанда, еншілес компаниялардың бірі «FSD» ЖШС электрондық сауда жүйелерін және олардың бағдарламалық жасақтамасын, оның ішінде бағаны көтеруге немесе төмендетуге баға ұсынысын берудің ашық және жабық нысандары бар аукциондарды, конкурстарды, жария ұсыныстарды, баға ұсыныстарын сұратуды және биржалық сауда-саттықты әзірлеуші болып табылады. Бұл ЭСА SharePoint, 1C және SAP сияқты бірқатар корпоративтік жүйелермен интеграцияны енгізуге мүмкіндік береді.

Коммерциялық компаниялардың сатып алу қызметін автоматтандыру және басқару мақсатында «FSD» ЖШС сондай-ақ «Ақылды сатып алулар» бұлтты сервисін енгізді. Бұдан басқа, компанияда ақпараттандыру объектілерінің ақпараттық қауіпсіздік талаптарына сәйкестігін тексеру үшін «Ұлттық аккредиттеу орталығы» ЖШС аккредиттеген сынақ зертханасы жұмыс істейді.